Mekdebimiziň täzelikleri

2024-nji ýylyň 2-nji noýabrynda Arkadagly Gahryman Serdarymyzyň gatnaşmagynda Saglyk ýoly boýunça köpçülikleýin ýöriş geçirildi. 

Hormatly Prezidentimiz Serdar Berdimuhamedow Türkmenistanyň Ministrler Kabinetiniň 2024-nji ýylyň 25-nji oktýabrynda geçirilen mejlisinde ýylyň dowamynda halkara sport ýaryşlarynda gowy netije görkezip, baýrakly orunlary eýelän türgenlerimizi sylaglajakdygy baradaky şatlykly habary halkymyza ýetirdi. Şolaryň hatarynda Türkmen döwlet maliýe institutynyň “Hasap we audit” fakultetiniň “Birža işi” taýýarlyk ugrunyň 1-nji ýyl talyby Begenjow Alp Arslanyň hem bolmagy juda buýsandyryjy pursatlaryň biri boldy.

Hemmämiziň bilşimiz ýaly, Begenjow Alp Arslan Ispaniýanyň Pontewedra şäherinde 2024-nji ýylyň 2-8-nji sentýabry aralygynda geçirilen dünýä çempionatynda (U-20) erkin göreş boýunça arassa ýeňiş bilen altyn medala mynasyp bolup, Türkmenistanyň taryhynda erkin göreş boýunça 20 ýaşa çenli pälwanlaryň arasynda ilkinji altyn medal gazanan pälwan hökmünde Watanymyzyň buýsanjyna öwrüldi. 

Ýokarda bellenilişi ýaly, 2-nji noýabrda geçirilen köpçülikleýin ýörişde Türkmen döwlet maliýe institutynyň talyp türgenine Hormatly Prezidentimiziň Şa serpaýyna, ýagny ak reňkli “Toyota Camry V6” kysymly ýeňil awtoulagynyň sowgat gowşurylmagy ýaş türgenimizi ýeneki ýeňişlere höweslendiren, halkymyzy hem buýsandyran waka boldy.

Türkmen sportuna giň badalga berýän, ýaşlaryň öz ukyp-başarnyklaryny dünýä ýüzünde açyp görkezmegi üçin uly tagallalary edýän Türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Gahryman Serdarymyza halkymyzyň buýsanjy boljak ähli ýaşlaryň adyndan köp sagbolsun aýdýarys. 

Goý, ýaşlaryň howandary Gahryman Arkadagymyzyň, nurana geljegimiziň binagäri Arkadagly Gahryman Serdarymyzyň janlary sag, ömürleri uzak, ýagty ertirleri nazarlaýan belent tutumly maksatlary hemişe rowaçlyklara ýar bolsun!